Елі сенген еріндегі жүрекке...
Елі сенген еріндегі жүрекке,
Ері сенген еліндегі тілекке,
Бір ауыл бар қазақылық сақталған,
Маңғыстау деп аталатын түбекте.
Сол бір өлке менің өскен ауылым,
Ондағы жұрт менің туыс бауырым,
Ондағы ел доспын десең сыйласып,
Ерегессе емін берген жауының.
Өкінбессің бір барып кайт түзге сен,
Ойлағаным инабатты қыз десең.
Ауылға бар, ауылға бар достым-ау,
Адалдықтың патшалығын іздесең.
Иелері адал ниет ақ істің,
Бөгеттері іштарлықтай ағыстың.
Жігіттер бар, жігіттер бар ол жақта
Қара нары абырой мен намыстың.
Ақсақал бар бүтін елге бас болған,
Алып қашу дәстүрі де сақталған,
Ол ауылда ағам менен жеңгем бар,
Үйленген соң махаббаты басталған.
Келсе-дағы сіңіп кеткен жат елден,
Ұмытпастан жылда құрсақ көтерген,
Алтын құрсақ аналар бар ол жақта,
Әр жыл сайын бір данышпан әкелген.
Қолпаш жасап, демесе де қауым мың,
Мен бәрібір сағынышпен ауырдым,
Бір білгенім қала жақтың мың күні,
Бір күніне жетпейді екен ауылдың.