Ақын өлеңдері жинағы ✍️

Шалғырт тартып,
Шау тартпай,
Ретімен қартайып,
Жан сүйері жанында
Сал-серідей жантайып,
Жұғып таза, мөп-мөлдір
Ауылының ауасын.
"Аман-түгел" тілекпен
Тауып жанның дауасын,
Мансап қумай, баққумай,
Шүкір етіп бергенге
Жүрген біздің Қоғаңды,
Жұртым, осал көрмеңдер!
Тал бойында мін болар,
Міні жоқ, деп ойламан.
Бірақ осы Қоғаңды
Кісі-ақ-ау деп ойланам.
Адал еңбек адамы,
Адалдығы міні боп,
Ойы, арманы, тілегі –
Анамыздың тілі боп,
Соныменен егдерді,
Соныменен кетеді.
Кішік адам дей алман,
Даңқ, атақта жетеді.
Қоғаң тілді шын сүйді,
Құр мансапты не етеді?!
Ана тілін ардақтап,
Соныменен өтеді,
Осы бақыт жетеді!