Ақын өлеңдері жинағы ✍️

Бармадым Лондонға да, Парижге мен,
Тамырым туған жерде тәрізді емен.
Жүремін алшаң басып Сарыарқамда,
Елімнің алдындағы парызбенен.
Бармадым Стамбул мен Анкараға,
Біреулер сол үшін де таң қала ма?
Мен деген – ардақты дос, асыл бауыр,
Мен деген – ізетті іні, дархан аға!
Баспадым көшесін де Варшаваның,
Қазақтың Бурабайы – аңсағаным!
Арқаның самалына кеудемді ашып,
Сәкендей тау ішінде ән саламын.
Көкше тау, жасыл орман, күміс бұлақ,
Мен үшін – тым аяулы, тым ыстық ақ!
Басқаның Жерұйығын не қылайын,
Қазақтың кең байтағы – ырысты бақ!
Қазақтың даласына құмар жаным,
Мен оған жүрегімнен жыр арнадым.
Өмірім өзіңде өтсе арманым жоқ,
Бұйрығы болғанынша бір Алланың!