Ақын өлеңдері жинағы ✍️

Жүрегімде жаһанның
мұң-наласы,
Шырақ — жырдың осы ма шын бағасы?..
Бір сөз айтып кетсем деп кейінгіге
Кірпік ілмей жүремін түн баласы.
Түн баласы жатамын кірпік ілмей,
Іші арпалыс ақынның
сырты күндей.
Әппақ жанын кірлетіп алмаңдаршы
Ақпандағы ақ қайың бүршігіндей.
Ақпандағы ақ қайың — дара қайың,
Әппақ нұрға шомылған баладайын.
Аламанға қосқаным — Ардакүрең
Қала көрме, көз жазып
ал, ағайын!