Ақын өлеңдері жинағы ✍️

Көктем көшесі. Жұпыны үйлер.
Жұпыны үйлер. Көктем көшесі.
Іңір көшеді. Үкілі күйме,
Көшеді іңір, көшкен нешесі.
Өрік гүлдеді дедің бе маған,
Жорышы тағы, түсімді өткен?
Көктем көшесі, қош келдім саған,
Қош келдің маған, үшінші көктем!
Күнікей көктем өткен болатын,
Қош айтар оған кез жетті деді...
...Жаңа жыл осы көктем болатын,
Қаңтар деп кімдер өзгертті оны?
Қарсы алам бәрін жаңа жырыммен,
Көктемдер, оны кеткен демеші...
Үшінші көктем, жаңа жылыңмен,
Жаңа жылыңмен, көктем көшесі!