Ақын өлеңдері жинағы ✍️

Би кеші еді,
Қасыңа жанай келдім,
Білмедім,
Көңілдегі қобалжу мен
Ұятты
Қысылуды қалай жеңдім.
Қарай бердім,
Жаутаңдаған жанарыңнан,
Жақсы үміт пен
Жақұттай жарқыраған арай көрдім.
Сен-дағы суытпай ажарыңды,
Жасыра алмай өңіңдегі таза мұңды,
Мен жақтан аудармадың назарыңды.
Өзегімді от болып өртеп өтті,
Жүзіңде ойнап пәктіктің назы ағынды.
Деп тұрдым ішімнен:
Іздеп таптым бақытымды, базарымды.
Еліктіріп әкетті екеумізді
Сабырсыз жастық шақтың сазы арынды.
Білдім сонда-ақ ғұмыр бойы, елжіреп
еститіндігімді,
Махаббатқа елтіген мәз әніңді.
Білдім, егде тартқанда ортақ сырды
Ой тереңінен қопарып қазарымды.
Білмеппін тек,
Бір отауда отырып от басында,
Осы шумақтарды жазарымды..