Ақын өлеңдері жинағы ✍️

Толғанай Торғыным-ай
Хорланым хор қызым-ай.
Кешігіп кезіктірген,
Тағдырдың қорлығын-ай.
Торғыным тор құлын-ай,
Оңаша ой-мұңым-ай,
Өзіңмен бірге жүрер,
Бермеді жолды Құдай.
Аққудың баласындай,
Көзімнің қарасындай.
Тосылып көргенім жоқ,
Тотым-ау дәл осындай.
Арамыз екеуміздің,
Ай мен күн арасындай.
Ай батса күнім шығып,
Күн батса айым туып.
Ай мен күн бір-бірімен,
Кездеспей қалатындай.
Қайтейін қарындасым,
Өмірдің заңы осындай.