Ақын өлеңдері жинағы ✍️

Еш қисыным құралмай,
Ел қатарлы жүре алмай.
Жақсыға да ілестім,
Жаманға да ілестім,
Жалғыз өмір сүре алмай
Іште жанып көмірім,
Өтті жарты өмірім.
Қуғанға да жолдас боп,
Қашқанға да жолдас боп.
Қатар жүрген пенденің,
Қалдырмадым көңілін.
Мені де арбап барады,
Дүниенің боқтығы.
Ал ішімде жанады,
Арман, ойдың от нұры.
Аман-есен жүрсем де,
Ойнасам да, күлсем де.
Көтерілмей қойғаны-ай,
Көңілімнің шоқтығы.
Менің бүйтіп жүргенім,
Күлмес жерде күлгенім.
Шын жұбаныш, шын ғашық,
Шын қуаныш, шын бақыт.
Болатындай жанымда
Ақ сәбидей күнәсіз,
Аяулымның жоқтығы.