Ақын өлеңдері жинағы ✍️

Ақын қазір жарты ақымақ, жарты сау,
Шынайы ақын болудан ол қорқады.
Өмір бақи ұзын арқан, кең тұсау,
Сәл қозғалса аяғынан тартады.
Ішің адал, айуанша өмір сүресің,
Жаның таза. Ал өмірің көргенсіз.
Адамдардың айтқанымен жүресің,
Өйткені ақын жәндіктен де дәрменсіз.
Жүрсе де оның қызыл тілі байланып,
Ақ сәбидей тап-таза ғой жүрегі.
Жазар кезде
Жаны құсқа айналып,
Жаратқанға барып қайтып жүреді.
Өлеңімен оятып бір ізгі үміт,
Өзге жұртты нұр жұмаққа кіргізіп,
Бірақ өзі ит боп өмір сүреді.