Ақын өлеңдері жинағы ✍️

Ауыл болып күтетінбіз хаттарын,
Қадір тұтып үшбұрышты қағазды.
Əскердегі елдің тізіп аттарын,
Отыратын кемпірлер,
Оқып болып намазды.
Бірте-бірте үшбұрыштар кешікті,
Үшбұрыштың үміт оты сөнбеді.
Айрылғанын жалғызынан кеш ұқты,
Үшбұрышты хаттарға ана сенбеді.
Күте-күте таусылса да шыдамы,
Хат арқылы іздестірді баласын.
Жанғандай да болды кейде шырағы,
Шақыртыпты Мəскеуге
Ер солдаттың Анасын.
Мерт болды ол түскен кезде сын басқа,
Азаматы болды елінің жаны ірі.
Ант етіпті майыспасқа, сынбасқа,
Үшбұрышты үміттердің қабірі.