Ақын өлеңдері жинағы ✍️

Кісі үйінде алқа бұзып,
Сезінбейді жасқансаң.
Өз үйінде арқан үзіп
Көрген емес ешқашан.
Кісі үйінде хан тәрізді
Көсем болып боратты ой.
Өз үйінде жан парызды
Моп-момақан қонақ қой.
Кісі үйінде айтатыны:
Ой, әрекет, іс, ақыл.
Өз үйінде би – қатыны,
Өзі – сорлы мүсәпір.
Кісі үйінде сиқыр шамнан
Шыққан жандай әуелгі.
Өз үйінде қиқу салған
Бәйбішеге тәуелді.
Оңашада ерсілігін
Сезе ме, әлде сезбей ме?!
...Жеткізе алмай кемшілігін
Қиналады-ау сөз кейде.