Ақын өлеңдері жинағы ✍️

Сонау кезде сезімім көмескі еді:
Сол қасиет өзгерді сен өскелі.
Күндіз күлкі, қалдым да түнгі ұйқыдан,
Бейнең кетпей көзімнен...
елестеді.
Бір жылылық жаныма құйып едің,
Бар қызығын ұмыттым дүниенің.
Жатсам-тұрсам...
ойымнан еш кетпейсің,
өзің болдың күйініп, сүйінерім.
Сүйдім, рас, білектей бұрымыңды,
Сүйдім, рас, сүйкімді қылығыңды.
Қанып ішсем деп едім, өкінбестей,
Мөлдірінен көзіңнің тұнығыңды.
Сүйдім, рас, қарақат көздеріңді,
Еркелікпен бұртиған кездеріңді.
Ойлаймын да ұялам өртенердей
Өзіңе айтқан алғашқы сөздерімді.