Ақын өлеңдері жинағы ✍️

Кейде менен оянып қуатты кек,
Кеудемде кеп дүңк етіп құлапты көк.
Жетім болмай жатып та,
Қайран жүрек,
Жетімі үшін жер-көктің жылапты кеп…
Шөліркеген гүлге де дір етіпті,
Өлең болып сол сәтте шыр етіпті.
Өзі жылап жатып та,
Қайран жүрек,
Өзгелердің шаттығын жыр етіпті!
Сол жүрекпен жүріппін, тентіреп көп,
Сол жүрекпен сүйіппін елжіреп мен.
Білесің бе,
Мен күллі өлеңімді
Сол жүрекпен жазған ем,
Сол жүрекпен…