Ақын өлеңдері жинағы ✍️

Түнек
Ей, Жарық!
Тобырдың сыңары не еді? –
Халық!
Сәуленің сыңары не еді? –
Түнек.
Ішек-қарынның сыңары не еді? –
Жүрек!
Махаббаттың сыңары не еді? –
Зұлымдық.
Адамзаттың сыңары не еді? –
Жылым-құрт!
Жарық дүниенің осы жөні, жосығы.
Сен білмейсің осыны!
Жарық
Аулақ, сұмырай, адамзаттан, пендеден,
Түнек қалай егіз болмақ Жарықпен?
Тұла бойын ана жыры кернеген
Бесік – қалай егіз болмақ Табытпен?
Алланың да айтқанына көнбеген,
Адамзаттың жолын баққан көлденең –
Тобыр – қалай егіз болмақ – Халықпен?!
О, Тәңірі!
Зілі жойқын, жат үні,
Естідің бе мына зұлмат дауысты?
Ақырзаман келгені ме ақыры?!
Дүниенің ақыл-есі ауысты…