Иоллығ-тегіннің аманаты
Мәңгі тас қалаттым,
жаздырдым.
Бұл жазуыд жаздырғанның аты –
Иоллығ-тегін
Күлтегін (кіші жазу)
... Даламның сыры мәлім,
Таулардың мұңы қалың.
Түркінің тіліндегі
Тұманың тұнық әнін
Самалмен, саф ауамен
Сіңірдім жүрегіме.
Көне Ғұн аңыздарын,
Мөденің бар ызғарын,
Ілкіде бабаларға
Түркінің қарыздарын,
Иланам ділімменен,
Бүгіннің білеріне.
Сағымға көзім қанып,
Сағыныш төзімді алып,
Өртенген өзегімді
Өзгеше сезім жарып,
Орадым өлеңімді
Ғұмырдың білегіне.
Түркінің тілі едім мен,
Шағында шын егілген,
Жасындай жырларыммен
Түнегін түре білгем.
Сенімді ем тас бойына
Сырымның сіңеріне.
Қапы ғып қашаған күн,
Өлмес қам жасағанмын.
Өзекті жарған жырды
Көк тасқа қашағанмын,
...Ғұн-баба әуенінің
Үңілдім сілеміне...
2
Тастар күбірледі
Дастар тіліндегі
Шертіп шежірені,
Елтіп, көз іледі,
Күн.
Өзен күңіренеді,
Кезең...
Ғұмыр өледі,
Күнге балқыған тәнін
Желпіп...сезінеді
Кім?!
Арман адыра қалып,
Жалған таңына налып,
Ажал жадылап алып,
Тұраққа жеткенше
Өкініш... әрі жұбаныш
Кезігеді мың...
Төбемде – Тәңірім,
Төменде – қабірім,
Тірлік – бес күндік.
Дұшпанның зәбірін
Көрмесін жұртым деп,
Семсермен сес қылдық.
Ұлан далаға үніміз сіңіп,
Ерліктің ұраны болып естілдік...
Бабаларым – Елтеріс,
Білге қаған,
Ағам – Күлтегін ер,
Есімдерін еске алсам,
Кеудемді бұзып шығардай
Жыр тебіренер.
Қаруым – қалам болды,
Түркінің қанында
Батырлық пен ақындық еді
Ақындық киесі маған қонды.
Қаған бабамның
Қаһарман ағамның
Түркі елі үшін күресін
Ұрпақ жадына жазуға
Көңілім алаң болды.
Тұлпар жалында ойнап,
Алапат кек қанында қайнап,
Атой салған қаһармандары,
Ой толғағанда кемеңгерлері.
Адырна аңырағанда,
Аламан жамырағанда,
Өн-бойымды өлең кернеді.
Тағдыры тәңірі жасар,
Рухымыз көкке ұшып,
Тәніміз жер жастанған-ды,
Батыр өлсе - өзі аңыз,
Ақын өлсе – сөзі аңыз,
Бабаларымнан - даңқ,
Ал, менен дастан қалды.
Ерлікті толғадым,
Елдікті қолдадым,
Өлеңмен өрнектедім,
Ұрпағым қабыл ал,
Қапысыз танып ал,
У дарып,
Жүректе шер кеткенін.
Мәңгіліктің
Қағанаты – жыр,
Шықпасын деумен
Жаманаты бір,
Шежіре шерттім
Тас кеудесіне,
...Иолығ-тегіннің
Аманаты бұл....