Ақын өлеңдері жинағы ✍️

Ботана су ағады құлай барып,
Жалғыз адам жағада тұр ойланып.
Оның жаны бұлақпен ағайындас
Ашуланса таситын лайланып.
Жағада тұр
Иiлген сұрақ-ғұмыр:
Лайлаған кiм екен бұлақты бұл?
Екеуiнiң алдында бүкiл әлем
Мелшиедi айыпты сияқты бiр.
Бұлақ жатыр бұрқырап сай көшiрiп,
Адам кеттi.
Барады ол қайда өшiгiп?
Лайлап ап жүретiн тұндыра алмай
Дүниенiң заңы осы әурешiлiк...