Ақын өлеңдері жинағы ✍️

Өмір деген –
өлімменен жарысу,
жыл құстары жетпес жерден әрі ұшу;
тыным таппай, тоқтар жерде тоқтамай,
бармайтұғын бас жақтарға барысу;
әрі әуен,
әрі өлең,
әрі шу,
нәр татып кеп, зәр ішу, не дәрі ішу;
шоқтан шығып төске түскен темірдей
көп тоқпақтан көз ашпақ боп қарысу;
сүт пе, бал ма, у ма, әлде сарысу?
ыстықпенен, суықпенен танысу;
өкпең барда өкпелесіп біреумен,
бауыр барда біреулермен табысу;
жүрек барда –
өліп-өшіп қауышу,
сезіміңмен, нәпсіңменен алысу;
өсіп-өніп, көшіп-қонып,
күн жетсе
құсқа айналып, Құс жолымен әрі ұшу...