Ақын өлеңдері жинағы ✍️

Көлден бір ұшқан дегелек,
Гүлден бір ұшқан көбелек,
Ойдың бұлты сөгіліп,
Ұстатпайды не керек?..
Бозаңнан ұшқан бозторғай,
Әніне көңіл бос болғай!
Қоштасып қалқа кеткенде,
Айтылмай қалды «Ақтолғай!»
Қалықтап ұшқан қарлығаш,
Өкпешіл екен қарындас!
Қалаға көшіп күйбеңдеп,
Алыстап кетті ауылдас.
Пырылдап ұшты топ торғай,
Көктемім, сен де қош болғай!
Сағыныш сырын білмейсің,
Жанарыңа жас толмай...
Шақырып таңда әупілдек,
Үреді күшік шәукілдеп...
Торғын – көңілді бұл күні,
Жыртпақ болады әркім кеп.
Көзден де ұшқан дегелек,
Көңілге жұпар себе кет!
Жанымның сырлы жұмбағы,
Шешілмей қалды не керек...