Ақын өлеңдері жинағы ✍️

Әлі ұмтылып келемін, әлі ұмтылып,
Көргені жоқ жалғанда жаным тынып.
Жетем демей, жатам ба тепеңдемей,
Ауызда антқа жеген наным тұрып?!
Бетімді биіктерден көрсетермін,
Құрулы шымылдықтың бәрін түріп.
Әлі қақсап келемін, әлі қақсап,
Әрі жасқап, бастыны әрі бастап…
Жылағанды уатсам, жынды басып,
Күндемеппін ешкімнің бағын асқақ.
Шаршатпаса, болғаны пенделердің,
Судан тұнық көңілді тағы аластап!..
Әлі сеніп келемін, әлі сеніп,
Жабырқасам, жақсының жаны серік.
Жақұтымды жарғаққа балар ма екен,
Еті үйреніп кеткендер, намысы өліп?
Шын ақын атын айға жазады ғой,
Қалса да дүниенің шамы сөніп.