Ақын өлеңдері жинағы ✍️

Жау күйініп, дос сүйініп қарасын,
Ғажап бүгін,
Кез жер-көктің арасын.
Қазақ Тілін тастап көшкен жұртыңа,
Азаттығым,
Қайда ұшып барасың?!
Жігер болса жетеңде Һәм ділінде,
Енді ілесе қоймассың жат ілімге.
Азаттығым,
Көтеріліп аспанға,
Сен сөйлейсің қашан Қазақ тілінде?
Ауыл көшті алтын бекет қала деп,
Жүрегімде наза да көп, нала көп.
Азаттығым,
Аспанға ұшсаң-самғай ұш,
Қазақ тілін қоса өзіңмен ала кет!
Жау күйініп,
Дос сүйініп қарасын,
Ғажап бүгін:
Кез жер-көктің арасын.
…Қазақ Тілін тастап көшкен жұртыңа,
Азаттығым
Қайда жөнеп барасың?!