Ақын өлеңдері жинағы ✍️

Еңіреген зарлы ұлдарың
Махаббатқа бағынады.
Эпостағы Тарғындарың
Құртқа аруын сағынады.
Содан қалған ізгі өлеңдер,
Рух болып осы арада.
Әуре болып іздемеңдер,
Төлеген жоқ Қособада!
Жоқ – ол.
Тәнін жалын – іші,
Ұшып келіп, танып көктен;
Қыз Жібектің Сағынышы
Ақжайыққа алып кеткен!
Мен де өлермін дарияның
Жағасында. Жалын – ішім...
Пәк тәнімді Ғалияның
Қасына апар, Сағынышым!