Ақын өлеңдері жинағы ✍️

Саған арнап сұлу жырдан гүл өрдім.
Гүл өрдім де тығырыққа тірелдім.
Рухыңды – бұлдыраған елестен –
Өлеңіме айналдырып жібердім.
Өлеңімсіз бозаң тартар өң кірмей –
Өр кескінің – өзегімнің өртіндей.
Дүниеде менен күшті еркек жоқ,
Бір әйелді алып қалдым өлтірмей!
Қанатымыз ұша-ұша талғанда,
Енді бізге құлау ғана қалған ба?
Бұл жалғанда сенен асқан ару жоқ,
Менен асқан еркек жоқ бұл жалғанда!
Саған арнап сұлу жырдан гүл өрдім,
Гүл өрдім де тығырыққа – тірелдім.
Рухыңды – бұлдыраған елестен
Өлеңіме айналдырып жібердім.