Ақын өлеңдері жинағы ✍️

Сендерге қарап - өзімді көрем,
Сонау бір албырт сезімді көрем.
Біріңнен қолаң шашымды көрсем,
Біріңнен қас пен көзімді көрем.
Сендерге қарап – жарымды көрем,
Ұлттық намыс пен арымды көрем.
Біріңнен қызу мінез байқасам,
Біріңнен талап, дарынды көрем.
Сендерге қарап, жылдарды санап,
Өтуде уақыт, жастықты тонап.
Арманға ұмтылып,
мына өмірге
Жүргендей болып бес күнгі қонақ.
Балпандарым,
балақандарым!
Дара тағдырлы, дара таңдарым.
Жетектеп келем келешегіме
Жанымды ерітіп алақандарың.
Сендермен бірге алға ұмтылып,
Келе жатырмын күнге құлшынып.
Менен ілгері кете беріңдер,
Ере алмай қалсам, жолда тұншығып.
Өмірге жаққан шамшырақтарым!
Көңілге жаққан жаншуақтарым.
Ұрпағымды да ұлтжанды етер,
Менің жырларым қамшылап арын.