Ақын өлеңдері жинағы ✍️

Өмірге не үшін келіп ек, достым, біліп көр,
Бәйгіден дәйім жүрейік болып үміткер.
Арғымақ сынды жосылтып жүрер қашанда
Артық бір туған азамат көңіл жігіттер.
Келгесін мынау дүниеге, достым, бақ сына,
Тәңірім әркез жақ болар өзі жақсыға.
Жаралып жарық ғаламға жанып өтпесек,
Жағада қалған жаңғақтай болсақ жақсы ма?
Намысты ердің сенімі болар алға нық,
Кешпес те тірлік азғана бақты малданып,
Мәнісі болмас бұғынып өтер ғұмырдың,
Күйбең күндерден азамат қашар арланып.
Бес күн тірлікте буа біл бекем беліңді,
Ерікпей босқа, еліңді ойла, еліңді!
Көркейтпек үшін кең дала, шалқар жеріңді,
Моншақтай етіп төге біл маңдай теріңді!