Ақын өлеңдері жинағы ✍️

Бозаң қырдың бұласы – бөрі сынды,
Батылдығы арландай, арыстандай.
Қазағымның айбаты, ары сынды,
Айға ұмтылып шапшыған барыс қандай!
Тажалдан да таймайтын сесі мықты,
Тайқымайтын табаны тарланым-ай!
Жасын жанар, мәрт мінез, төсі мықты,
Киелі қыр тағысы – тарпаңым-ай!
Туған елмен тел өскен дала дүрі,
Таң нұрынан жаралған бек асылым.
Дауысы мен даңқы да, даралығы
Тауып тұрар тегінде жарасымын.
Дүлдүл десем, дариға-ай, тіл тимесін,
Дөңгеленген дүние орамында.
Даламдайын дүр етіп сілкін де шын,
Тербеле бер тіршілік тарамында.
Өнебойын өртеген отты намыс,
Өрекпісе өзгеше түрге енер ме?
Көк Тәңірдің еркесі – Текті Барыс,
Көзін тіккен кербезім күллі әлемге!