Ақын өлеңдері жинағы ✍️

Тегіміз бір көшпендіміз далалық,
Өтті, кезең көшіп жүріп балалық,
Ағайынның аты озғанша бәйгеден
Ауылдастың тайы озғанын қаладық.
Жырғып айтар барып келсе қалаға,
Отыратын жетпейді, деп далаға.
Сол ауылдың әңгімешіл қарттарын,
Ұқсатамын ақыл қосар данаға.
Келгендерді жатсынбай-ақ жататын,
Күн нұры да ортақ бізге ататын.
Қауқылдасып, мауқын басып тұрғандай
Қиялмастан күн де зорға бататын.
Сағынасың балдай тәтті бірлігін,
Сағынасың хош иісті қыр гүлін
Түстей болған елестетсек ал қазір,
Сұрау белгі иіліп тұр бүгін?..