Керім ағама арнау
Елеулі елге ағамсың,
Құрметті адам болғансың!
Өзіңіз жайлы жазбасам,
Болатын шығар маған сын.
Сіз жайлы көп- көп толғандым,
Қаламды сосын қолға алдым,
Еңбегі сіңіп еліне,
Өзіңнен артық болған кім!?
Ауылдан кеттің жырақ тым,
Тапты ма күншіл бірақ мін?
Әуреге салды қудалап,
Баласы деп құлақтың.
Мың пайдаң тиіп қоғамға,
Ақталып келдің одан да!
Қарадай жүріп жаман- ау,
Жабылса жала адамға.
Ұлылық ата –бабаңда!
Ұрпаққа қонса жаман ба!
Қасиеті солардың,
Берілген, көке, саған да.
Азамат ердің бірі едің,
Майда емес, рухы ірі едің,
Жеке бастың қамы емес,
Соғатын ел деп жүрегің.
Ағартушы ұстаз ең,
Білімнің жолын ұстап ең,
Жүздеген мектеп салдырып,
Болашақ жолын нұсқап ең.
Тарихта қалды өткенің,
Бекерден бекер кетпедің,
Білімнен жатыр өрге өрлеп,
Өзіңнің ашқан мектебің.
Сүйіп ең туған жеріңді,
Қуанттың тағы еліңді:
Төрт қабатты мектепке,
Есімің бүгін берілді!
Оқытып барлық баланы,
Өсірер ұрпақ саналы,
Мектеп деп соққан жүректе,
Тарихта атың қалады.
Есімің мәңгі қалады,
Жұлдыз боп талай жанады,
Әр жеңіс, әрбір мереке,
Ұрпақтар еске алады!