Ақын өлеңдері жинағы ✍️

Бар тілегім, жан- жүрегім, жан балам,
Қанша сүйсем мейірімім қанбаған.
Қанатымсың, санатымсың тірлікте,
Жырым түгіл, өзім түгел арналам.
Мұрт тебіндеп, менен биік бойың да,
Құштарсың-ау еркелік пен ойынға.
Бір ақ келін адалынан жолығып,
Қыз тапқандай қуансам-ау тойыңда.
Қуанышым, қуат күшім, қазынам,
Өтпей қалған кезі жоқ-ау базынаң.
Сен ойымнан шықпағанда ауырып,
Сен күлгенде, сен сүйгенде жазылам.
Аппақ көңіл, елпектеген елігім,
Еркелетіп жүрер ме екен келінім?
Ең бастысы – орның болып өмірде,
Мақтанышы, еркесі бол еліңнің.