Ақын өлеңдері жинағы ✍️

Тірлікте жылдар маусымды,
Жатташы осы даусымды,
Тасыған бұлақ – тілегім,
Тоғысып саған, таусылды.
Балғыным, бір сәт қатайсаң,
Жыласаң жыла тау сынды.
Көтеріп тағдыр салмағын,
Жанымды саған арнадым.
Өзгеге қандай болсаң да,
Өзіңсің сұңқар, тарланым.
Жетпеген мұрат – арманым,
Жан балам, саған жалғадым.
Озғанды сенен күндеме,
Жол тапшы тұман, түнде де.
Сылдыр-су сөзге шөлдеме,
Көзің бір жетпей шын деме.
Құрметтеп өткіз әр күнді,
Бұл өмір біреу, мың деме.
Сең болып ақсын талай мұң,
Жылу бер елге, арайлым.
О, рухтар, сақта тіл- көзден,
Сұқтанғандарға бол айбын,
Анаңа сенсіз өмір жоқ,
Сондықтан Күнге балаймын.
Алғаның жарқын Ай болсын,
Ақыл мен мінез сай болсын.
Тау қатпарлы санаңа,
Ақ ұлпа бұлт-ой қонсын.
Жинаған малым шашу боп,
Той болсын, тағы той болсын!