Ақын өлеңдері жинағы ✍️

Тіршілік нұрға ғашық,
Құшағын жаяды айдын.
Кеудемнен шуақ шашып,
Мен сені аялаймын.
Қиналсаң, қуаттаймын,
Мамаңды атайсың тек.
Жыласаң жұбатпаймын,
Бекініп, қатайсын деп.
Кім білген не күтерін,
Дауыл, не сынақ тұр ма?
Санаңа бекітерім:
Езіліп жылап тұрма.
Жастықтың бал қызығын,
Жігерін, бар қызуын.
Жолыңа құрбан етем,
Жарығым – жалғыз ұлым.
Саялы бақ, шынарым,
Бірі бол жақсылардың.
Жалауын өмірімнің,
Өзіңе тапсырамын.