Ақын өлеңдері жинағы ✍️

Тұнығын судың лайлап,
Тіл ұшымен құдайлап,
Апасы мен інісі.
Бүлкілдетіп көмейді,
Өсек сөзі көбейді,
Өмірдегі ырысы.
Ойласып арыз құрады,
Бұл – мақсатты ұраны,
Апасы мен інісі.
Іздеді қуып бәлені,
Бәленің гүлдеп пәлегі,
Жарқын-жарқын күлісі.
Плансыз астық септің деп,
Асыра сілтеп, екпіндеп,
Апасы мен інісі.
Халыққа астық бердің деп,
Пайдасын жердің көрдің деп,
Менімен болды бір ісі.
Үш нөлді жалғап бір санға,
Жетті бір асқын-ыржаңға,
Апасы мен інісі.
Абаққа мені қаматты,
Бастыққа жету таңы атты,
Кең ашылып тынысы.
Амандық еді арманым,
Аштықтан елді қорғадым.
Пернехан мен Заманхан!
Бір соққандай жүрегің,
Төрімде төрт жыл шірендің,
Әлі күнге болам таң.