Ақын өлеңдері жинағы ✍️

Сен жаққа секунд сайын алаңдадым,
Ауырды бойымдағы балаң – дарын.
Өзің деп, сен деп соқты сағат-жүрек,
Сен жайлы жаза берді қаламдарым.
Өзгенің жаңылдырдым есімдерін,
Сен болдың ойлар ойым, есімдегі үн,
Білмеймін, бағымсың ба, сорымсың ба,
Тағдырда сағым болған кесім бе едің?!
Білмеймін сенсіз өмір сүре алам ба?
Бір сүйеу керек екен бір адамға.
«Баянды бақыт, өлмес өмір» десем,
Тілекті бере ме Алла сұрағанға?
Байлық, тақ, сұлулықтың керегі не!
Ынтықтым жалғыз сенің дерегіңе.
Мүмкін бе сәби пейіл жылап қалу,
Ұқтыршы, қаталдықтың себебі не?