Ақын өлеңдері жинағы ✍️

Жүрек қылын тербейтін жан самалы,
Саумал сезім – адамның аңсағаны.
Жұпар сезім, от сезім, жасық кезің,
Жан сырыңмен әлемге жар салады,
Басқа жүрек сен болып тамсанады.
Ақ жарылып айтасың адалыңды,
Жан-тәніңді арнаған адамыңды.
Табынғаның, көз жасың, сағынғаның,
Жаңылғаның, адасқан қадамыңды,
Жасырмайсың оқтаған садағыңды.
Тірілердің бәрінен безінгенің,
Жындануға шақ қалып, езілгенің,
Қуат алып қайтадан жақсылардан,
Жырмен тербеп үміттің тал бесігін,
Кешті жалғап таңдарға көз ілгенің.
Қаймықпаймын кейбіреу табалар деп,
Адал сырды ақылды бағалар тек.
Өзегіне өрт түсіп, қиналғандар,
Оқығанда ағызар жасын сөртек.
Кеудеңді ашып, самалға жақын бар тек.