Ақын өлеңдері жинағы ✍️

Домбырам менің
Бабамнан қалған байлығым,
Өзіңмен бірге
Қуаныш, қызық, қайғы, мұң,
Күмбірің күллі
Дүниені кернеп, тербеген,
Оркестрлерге
Симфонияларға сай бүгін.
Бұйығы жондай
Булығып жатқан шанағың,
Бұраулы шегің
Жолындай ұзақ даланың,
Тұрлауы жырдың,
Тірегі күйдің
Тиегің,
Арманын қуып
Бойымен аққан сағаның.
Боздатып келген
Байырғы күннің гөй-гөйін
Мәңгілік менің
Мәртебем,
Биік мерейім,
Қорғасын құйып
Күйдіріп
Бітеп қойса да,
Бұзылмай күйің
Бүлкілдей берген көмейің!