Ақын өлеңдері жинағы ✍️

Шыға сала құрсақтан
Көзден жасы моншақтап,
Маңдайдан тер бұршақтап,
Жүрген әзер жан сақтап
Адам кеше кім еді?
Жанған оттың сөнуін,
Өскен санның кемуін,
Онның тоғыз болуын,
Жүздің тоқсан болуын
Алла ғана біледі.
Өшкен отты жандыру,
Шөлдегенді қандыру,
Жақсылыққа нандыру,
Артына ұрпақ қалдыру –
Адамзаттың тілеуі.
Шыққан гүлдің солуын,
Жаз өтіп, күз болуын,
Тоғыздың он болуын,
Тоқсанның жүз болуын
Алла ғана біледі.