Ақын өлеңдері жинағы ✍️

Күнге,жаным, құмарсың,
Шуағы –өзің сияқты.
Гүлден алған шығарсың
Бетіңдегі ұятты.
Шашың сенің–қара орман
Жапырағы төгілген.
Күле шықтың сен алдан
Қардай аппақ көңілмен.
Пейілі бар өзіңде,
Дала десе, сенемін.
Тұңғиық-ты көзің де,
Теңізге мен теңедім.
Жолығып ем мен кеше,
Қабағыңда бар ызғар.
Қыс та саған, ендеше,
Болмаған-ау қарыздар.
Бәлкім, біреу сенбей ме,
Қалай бұған шыдармын?
Бұлтқа еліктеп сен кейде,
Жылайтынды шығардың.
Ондай кезде қиналам,
Шалқып-тасып жүр, жаным.
Барын саған сыйлаған
Табиғатқа ырзамын.