Ақын өлеңдері жинағы ✍️

Ертең жоқпын, дүние, бүгін бармын,
Биік болсын өмірде тұғырларың.
Әй, достым, құтты болсын бүгінгі күн,
Бүгінгі күн – мейрамы сұлулардың.
Жүректің түрмесіне қамалар мұң,
Қарыштап өсе түспек бағамы әр күн.
Әй, достым, құтты болсын бүгінгі күн,
Бүгінгі күн – мейрамы аналардың.
Аруларға айтыңдар тең келер кім?
Тең келер кім, мен кімді тең көрермін.
Әй, достым, құтты болсын бүгінгі күн,
Бүгінгі күн – мейрамы жеңгелердің.
Алла сенің әрқашан бағыңды ашсын,
Баян мен Жібектердің жолын басқын.
Әй, достым, құтты болсын бүгінгі күн,
Мейрамы сіңілі мен қарындастың.
Демеймін ар мен намыс туын жыққын,
Әр күніңнен әй, көктем, жылу күттім.
Достарым, құтты болсын бүгінгі күн,
Бүгінгі күн – мейрамы сұлулықтың!