Ақын өлеңдері жинағы ✍️

Келеді түбі бір өлім,
Себебін менен сұрама.
Күллі әлем сыйған жүрегім,
Табытқа сыймас сірә да.
Қайғыға бастап нала-мұң,
Жылыстап өткен күндермен.
Түсімде өліп қаламын,
Өңімде тірі жүргенмен.
Өмірдің өзі алдамшы,
Көңілдің қайтем тоқтығын.
Жалғанның соңы – заңғар шың,
Ал оған шыққан жоқ бүгін.
Өткеніме еш өкпем жоқ,
Келер күн аян Аллаға.
Қуанышым жетер көктем боп,
Жұбанышым да сол ғана.
Жанымның сырын шертем де,
(Бақыттың қайда бал дәмі?)
Өзімді қойшы, ертеңге,
Өлеңім жетсе болғаны.