БІР АУЫЗ СӨЗ
І
Бір ауыз сөз қасіретті тыяды,
Бір ауыз сөз айықпас дерт жияды.
Бір ауыз сөз әлемге әйгі еткізсе,
Бір ауыз сөз жаманатқа қияды.
Бір ауыз сөз мұхиттарды жалғайды,
Бір ауыз сөз ұран болып самғайды.
Бір ауыз сөз ұшса бақыт құсы боп,
Бір ауыз сөз арсыз жандай алдайды.
Бір ауыз сөз таң шолпанын әперер,
Бір ауыз сөз анаңдай боп мәпелер.
Бір ауыз сөз ұл туды деп қуантса,
Бір ауыз сөз әке өлімін әкелер.
Бір ауыз сөз жан тетігін табады,
Бір ауыз сөз мың әуреге салады.
Қимас жандар көз жұмарда қоштасып,
Бір-ақ ауыз сөз айтысып қалады.
ІІ
Бір ауыз сөз шыңға қанат сермейді,
Бір ауыз сөз мәңгі маза бермейді.
Бір ауыз сөз жау оғындай қинаса,
Бір ауыз сөз ескі дерттен емдейді.
Бір ауыз сөз бесті асаудай тулатар,
Бір ауыз сөз үн шығармай мұң батар.
Бір ауыз сөз сай-сүйекті сыздатса,
Бір ауыз сөз көздің жасын құрғатар.
Бір ауыз сөз бақыт берер жетегі,
Бір ауыз сөз мәңгі қас боп кетеді.
Бір ауыз сөз тірі күнде айырса,
Бір ауыз сөз айнымас дос етеді.
Бір ауыз сөз ішінде мың амал бар,
Бір ауыз сөз ғұмырыңды тәмамдар.
Бір ауыз сөз... қимас дос боп өтеді
Бір ауыз сөз айтыспаған адамдар.