Ақын өлеңдері жинағы ✍️

Мен кеткен жылы жауды Алтайға қар қалың,
Жаныма батты шыға алмай содан қалғаның.
Алтайдың сыры белгілі маған, білем ғой
Қалың тайга, қоршаған таулар жан-жағын.
Сен Алтайда, мен Арқада жатырмын,
Арамызда мың бес жүз-ақ шақырым.
Аңдитыным теледидар, ал онда:
«Өскеменде қар жауып тұр ақырын».
Арқада – аяз, Алтай жақта қар қалың,
Маған да қиын, өзің біл енді ар жағын.
Барайын десем, бәрі де азар-безер боп:
– Жөн болар, – дейді, – көктемде бірақ барғаның.
Қар жауып жатыр... Кім көрген бұрын мұндайды,
Шарасыздықтан ауырып жүрек сыздайды.
Ирандағы Мырзатай аға сияқты,
Әдет қылдым «Тотым-ауды» тыңдауды.
... Уақыт зырлап, жазым да жылжып келген-ді,
Серпіліп бір сәт, есімді жидым мен де енді.
Әлібек айтты: – Әй, аға, босқа жүдемей,
Алып кел барып, Алтайда қалған жеңгемді.
Ағайын-туыс шығарып салды жиылып,
Туған жер, таулар, қарады қимай қиылып.
Еңкейген шақта еріксіз кеттім Алтайдан,
Астана жаққа Арқаның дәмі бұйырып.