СЕРІКТЕР
Бұл өмірге қуаныш боп,
Көрік боп,
Адалдыққа, махаббатқа жерік боп,
Өмір сүріп жүргендердің ішінде,
Санай берсең, бәрінен де «Серік» көп.
Сен де Серік,
Мен де Серік –
Танып қой.
(Серіктерден көз сүрініп, жалықты ой.)
Ал, бірақ та,
Баласына кім болсын
Жаман есім бермейтіні анық қой.
Баласына ат қоймайды бекер жұрт.
Оның ылғи заты – жолдас, аты – ерлік.
Бірі – шопан,
Бірі – малшы, күзетші,
Серік деген қайда болсын жетерлік.
Серік деген есім жұртқа ұнайды.
Бірі – сұңғақ,
Бірі – сымбат, шырайлы.
Серіктердің басын қосса шынында,
Анау-мынау ауылыңды құрайды.
Біреуі бар Москвада тұратын,
Ал біреуі тапты БАМ-нан мұратын.
37
Бірі – токарь,
Бірі – шофер,
Бірі – әнші,
Бірі – күйші,
Бірі – сыншы,
Бірі – ақын.
Бірі – боксер таңғалдырған әлемді,
Бірі – актер сан мәз қылған бар елді.
Бірі – шахтер жер астына бойлаған,
Серіктерден артық кім бар ал енді!
Табын-табын мал айдаған бақташы,
Қанар-қанар қап байлаған мақташы.
Бірі – «Еңбек», «Динамода» шаңғышы,
Бірі – «Қайрат» ойынында қақпашы.
Көкшетауда,
Көктөбеде,
Кегенде.
Балқантауда,
Баянауыл,
Бөгенде.
Бірі мынау Шалқар жақта, Ырғызда,
Бірі сонау Балқар жақта – Шегемде.
Серік аты барлық елге таралған,
Басын қосып бар қуаныш, бар арман.
Серік деген атына сай өздері
Бір-бір жарға серік болып жаралған.
Серіктерді көп тізді деп, қарағым,
Кінәлама, санап бітсең жарадың!
Уақыт өзі салар түбі сарапқа
Қай Серіктің мәңгілік боп қаларын.