Ақын өлеңдері жинағы ✍️

Әлемнің алып есігін айқара ашып келіппін
Келіппін саған, дүние,
Келгім де, бәлкім, жоқ па екен, шар ете түстім
қорыққаннан
Қабағым тастай түйіле.
Шырылдап бәлкім жаттым ба келгенде саған күйіне,
Түстім-ау деп тағдырдың талқысы мен иіне.
Шырылдап бәлкім жаттым ба келгенде саған сүйіне,
Келдім деп саған, келдім деп дариға дархан дүние.
Жап-жарық екен төңірек, нұрлы екен жүзі көктің де,
Ынтызар еттің еріксіз соңыңнан мені ерттің де.
Көбелек қуып, гүл теріп, кер дала төсін шарладым,
Маужырап тұрған дүние-ай, көркіңе сенің елттім де.