Ақын өлеңдері жинағы ✍️

Аялдамай өтіп кетті көп күнім,
Жолаушыға ұзақ жолда жоқ тыным.
Көрген сайын бұл фəнидің «боқтығын»,
Сезген сайын келер қайран жоқтығын,
Тауысқандай бойымдағы төзімді,
Кінəлідей сезінемін өзімді.
Дей алмаймын: «Топтан озған тарланмын»,
Кейде өрмелеп, кей кезде тал қармандым,
Ұққан сайын алдамшысын жалғанның,
Шыққан сайын биігіне арманның,
Түйедейім түймедей боп көзіме,
Көңілім бір толмай қойды өзіме.
Жыр-сапарға буып едім белімді,
Жан емеспін іздеп жүрген жеңілді.
Жолдас қылсам үмітіме сенімді,
Күдікті ойлар кейін қарай шегінді.
Өз басыма көңілім толмай жүрсем де,
Барған сайын жақсы көрем өмірді...