Ақын өлеңдері жинағы ✍️

Ақ таяқпен тауға шықтым,
Ерке бұлақ, қайда асықтың?
Ақ қайың мен əппақ қойтас,
Мекені ғой сан ғашықтың.
Бұл жайлауды кім білмейді,
Шегірткелер шүлдірлейді.
Қыран бүркіт шаңқ-шаңқ етіп,
Қара тастар күмбірлейді.
Өзінсің деп айтар əнім,
Қарлыққанша айқайладым.
Жаңғырыққан дауысымды
Жақпар тастар қайталады.
Тау биікте, дала қашық,
Ақша бұлттар ала қашып,
Үміт, күдік жағаласып,
Ернеуінен барады асып.