Ақын өлеңдері жинағы ✍️

Өксіп кетті қанша жыл, жылап кетті қанша күн...
Қасиетті сөздерді қайталаудан шаршадым.
Бай ұлындай жеріген қылығынан ханшаның,
Көлкілдеген сөздерден, күлкілерден шаршадым.
Суығынан пəтердің, ыстығынан моншаның,
Бірде тонып-селкілдеп, бірде терлеп шаршадым.
Аялаған арудың жанарына қонса мұң,
Тасып-толған жандармен алысам деп шаршадым.
Тиын санап біреулер, біреу санап мал санын,
Арамдардың санына жете алмай мен шаршадым.
Қап-қараңғы жүрегін кеуде керген баршаның,
Алар ма еді аластап бұтағымен аршаның?!
Сабағынан үзілді мезгіл жетпей қанша гүл,
Күнəдан пəк, алаңсыз бала күнді аңсадым.
Тоқта, тоқта, бауырым!
Дейді біреу: «Сəл, сабыр!»
Тоқтаймын деп оқталып,
тоқтай алмай шаршадым.