Ақын өлеңдері жинағы ✍️

Аңсаймын кеп алыстасам ел ішін,
Арма екенсің, айналайын, шат алап.
Бірі - ағайын, бірі-туыс мен үшін,
Осы шығар саған деген махаббат.
Қиыр жердің татсам да бал жемісін,
Қақ - сазыңды сағынамын қаталап.
Қойның - самал, құмың - сая мен үшін,
Осы шығар саған деген махаббат.
Ата - бабам кір шайқаған жерісің,
Аунар ма едім шалғыныңа жата қап.
Тауың - жазық, тасың - мамық, мен үшін,
Осы шығар саған деген махаббат.
Іздемеймін мен жер - ұйық кенісін,
Сен тұрғанда керек емес жат алап.
Қарғаң - бұлбұл, Жабың - дүлдүл мен үшін,
Осы шығар саған деген махаббат!