Ақын өлеңдері жинағы ✍️

Көңіліңді жабырқатса тыныш бақ,
Жүгіре шық белес қуып тыныстап.
Жауқазындар жаутаң қағып тұрады,
Көктеменің күміс шығын уыстап.
О, кербездік! Гүл білегін сермесіп,
Жерде туып, жерден нəр ап, жерде өсіп.
Күн - серіге сүйгізеді еркелеп,
Ашып қауыз-пердесін...
Көктем-бикеш көк көрпесін өтектеп,
Көтеріліп келе жатыр етектен.
Жауқазындар алып шықты асқарға,
Сұлулықты жетектеп.