Ақын өлеңдері жинағы ✍️

Бәрі бекер
Бұл өмір де болмаған.
Сенім қайда?
Пәтуа-пір зор маған.
Тереңдікке бойлағанда ой-санам
Биіктіктен Тәңір нұрын жолдаған.
Сенім, сенім...
Кейде одан адасам.
Оны ұғасың жанарыма қарасаң.
Сөз алдында – сенімсіздік, қымсыну
Көз алдында – бұлыңғыр күн, ала шаң!
Сен мені ұқ!
(Ұғарына сенбеспін.)
Жалғыз анық – өлмес өмір, сөнбес күн.
Тілегімен Тәңіріне тәубе айтып
Жүрегінен ұшырмайды шерді ешкім.
Өмір болды, жамылғанбыз желегін
Өлім де бар
(Қамалады неге мұң?)
...Дүниенің дүрмегінен құтқарар
Өлеңім бар,
Соған ғана сенемін!