Ақын өлеңдері жинағы ✍️

Дәл жаныңда досың тұрса мысқылдап,
Жаздың өзі жауратады, қыс тұрмақ.
Жел ызғиды жүрегіңнің үстімен,
Қар жауады содан кейін ұшқындап.
Күңіреніп күзді күнгі көкпектей,
Жатып қалар жан-жүрегің етпеттей.
Қайта-қайта итереді кеудеңнен,
Әлгі мысқыл ішке теуіп беттетпей.
Ой – найзағай жүрегіңді тілгілеп,
Қойыныңды аралайды жынды леп.
Жанталасып жағадағы балықтай,
Дал боласың: “Жақын тартқам кімді?” деп.
Досың еді ол... кеше жүрген қайғың жеп.
Сұрай көрме “Неге жолдан тайдың?” деп,
Құтылғанға қуан қайта дер шақта,
Мақұлықтан мысық тілеу, маймыл бет...