ҚОБЫЗ САРЫ
(толғау)
Дастан болып даланың,
Дауы бөлек жатты ғой.
Ана менен баланың,
Мұңы жанға батты ғой.
Өрт шарпыды өзекті,
Өкініш деген мың батпан.
Келеміз күтіп кезекті,
Қарақшы болып түн қатқан.
Бар жалғандық күлкіңде,
Түңілдім
-ау тірліктен.
Бар жамандық бұл күнде,
Төніп тұрад түңліктен.
Барлық адам іздейді,
Бақ жұлдызын жырақтан.
Мұңлы күйін үзбейді,
Қобыз сарын құлақтан.
Бірақ, соны ұғынып,
Тыңдайтұғын адам аз.
Бəрі
-дағы бұғынып,
Қалған жалған жазадан.
Азаматтың ақылын,
Алаяқтар арбады.
Барғыза алмай батылын,
Азап болды арманы.
Қобыз сарын құбылып,
Құлағың түр қас
-қағым.
Қобыз шабыт шақырып,
Қоңыр өлең бастадым.
Қобыз сарын ішінде,
Қанат қағып құмайлар.
Қобыз сарын ішінде,
Қорланады жұбайлар.
Қобыз сарын ішінде,
Құқайланып зұлымдар.
Қобыз сарын ішінде,
Шырқырайды құлындар.
Қобыз сарын ішінде,
Бозінген зар қозғайды.
Қобыз сарын ішінде,
Боталар да боздайды.
Қобыз сарын ішінде,
Кісінейді құраттар.
Қобыз сарын ішінде,
Маңырайды лақтар.
Қобыз үні саралы,
Бұрынғының сарыны.
Қоңыр əуен бағалы,
Бабалардың дарыны...
Қобыз сарын үндердің,
Ішіндегі ерке еді.
Ол кешегі күндердің,
Шежіресін шертеді.
Қобыз сарын ішінде,
Қорқыт ата сөзі бар.
Қобыз сарын ішінде,
Маңырайды қозылар.
Қобыз сарын ішінде,
Əлде кімдер күледі.
Қобыз сарын ішінде,
Бөлтірік те үреді.
Қобыз сарын ішінде,
Уілі бар желдің де.
Қобыз сарын ішінде,
Дүбірі бар елдің де.
Қобыз сарын ішінде,
Қоңыр аңның үні бар.
Қобыз сарын ішінде,
Қоңыр адыр түні бар.
Қобыз сарын ішінде,
Ұраны бар бабаның.
Қобыз сарын ішінде,
Қыраны бар даланың.
Қобыз сарын қамыстың,
Əкеледі ызыңын.
Қобыз сарын намыстың,
Əпереді қызуын.
Қобыз сарын батырдың,
Көрсетеді айбарын.
Қобыз сарын ақылдың,
Айта алады байламын.
Қобыз сарын ішінде,
Ғашықтардың мұңы бар.
Қобыз сарын ішінде,
Бақсылардың жыны бар.
Қобыз сарын жауынды,
Жас қып бірақ төгеді.
Қобыз сарын тауыңды,
Тағың етіп береді.
Қобыз сарын арманды,
Армандарға бастайды.
Қобыз сарын жалғанды,
Қоңырымен жасқайды.
Қобыз сарын көзіңе,
Жас моншағын жинайды.
Қобыз сарын өзіңе,
Өзіңдікін сыйлайды.
Қобыз сарын құстардың,
Бейнелейді əуенін.
Сондықтан да құштармын,
Қоңыр менің əуенім.
Қобыз сарын бақаның,
Шуылын да тыңдатар.
Қобыз сарын атаның,
Өзі болып тіл қатар.
Қобыз сарын ішінде,
Жараланған бұғы бар.
Қобыз сарын ішінде,
Тарих бар ұғынар.
Қобыз сарын ішінде,
Ойран болған қала бар.
Қобыз сарын ішінде,
Обал болған бала бар.
Қобыз сарын боздатып,
Желдіреді түйені.
Қайғы
-мұңды қоздатып,
Босатады жүйені.
Қобыз сарын ішінде,
Серісі бар даланың.
Қобыз сарын ішінде,
Көрісі бар ананың.
Қобыз сарын өмірдің,
Оркестірін ойнайды.
Қобыз сарын көңілдің,
Тумаларын тойлайды.
Қобыз сарын ішінде,
Найзағай от үйірер.
Қобыз сарын ішінде,
Қорбаңдайды бүйілер.
Қобыз сарын ішінде,
Қайталанған тілек бар.
Қобыз сарын ішінде,
Тұлпар мінген түлек бар.
Қобыз сарын ішінде,
Адасқан бір киік бар.
Қобыз сарын ішінде,
Арылмас бір күйік бар.
Қобыз сарын ішінде,
Сағыныш бар түгемес.
Қобыз сарын ішінде,
Жалғасы бар бір егес.
Қобыз сарын ішінде,
Ерлік жайлы кеңес бар.
Қобыз сарын ішінде,
Елдік жайлы егес бар.
Қобыз үні киелі,
Қоңыр əнім өзімнің.
Қобыз үні жүйелі,
Қорғасыны сөзімнің.
Қобыз сарын самалы,
Айжуалы өлкемнің.
Ұрпақтарға саналы,
Мұңын шаққан ертеңнің.
Қобыз сарын ішінде,
Шөліркеген марал бар.
Қобыз сарын ішінде,
Шөбі өртенген арал бар.
Қобыз сарын ішінде,
Басын буған лашық бар.
Қобыз сарын ішінде,
Қосылмаған ғашық бар.
Қобыз сарын ішінде,
Ашылмаған бір гүл бар.
Қобыз сарын ішінде,
Арғымақ бар, дүлдүл бар.
Қобыз сарын ішінде,
Жылан да бар ысқырған.
Қобыз сарын ішінде,
Құлан да бар пысқырған.
Қобыз сарын ішінде,
Керуен бар тізілген.
Қобыз сарын ішінде,
Серуен бар үзілген.
Қобыз сарын ішінде,
Айтағы бар малшының.
Қобыз сарын ішінде,
Айқасы бар қамшының.
Қобыз сарын ішінде,
Жел көтерген жауын бар.
Қобыз сарын ішінде,
Ел көтерген дауым бар.
Қобыз сарын ішінде,
Дөңгеленген құйын бар.
Қобыз сарын ішінде,
Жөнге келер жиын бар.
Қобыз сарын ішінде,
Көбік шашқан теңіз бар.
Қобыз сарын ішінде,
Еңіреген егіз бар.
Қобыз сарын ішінде,
Көрілмеген жүлде бар.
Қобыз сарын ішінде,
Көмілмеген мүрде бар.
Қобыз сарын ішінде,
Жақсы да бар, жаман бар.
Қобыз сарын ішінде,
Зарға толы заман бар.
Қобыз сарын ішінде,
Айтылмаған əні бар.
Қобыз сарын ішінде,
Тіршіліктің бəрі бар.
Қобыз сарын əн қылып
Сырын ылғи шертеді.
Қобыз сарын мəңгілік
Түгемейтін ертегі.